الفضول محرك التجربة

عندي كمّ فضولي عالي جدًا. أحب أفهم كيف تعمل الأشياء، لماذا نتصرف بطريقة معينة؟ كيف يفكر الآخرون؟ ماذا يحصل داخل الجسم وكيف نقيسه؟ ما وراء سلوك الإنسان؟ كيف تُبنى الأنظمة؟ هذا الفضول مو مجرد هواية، هو غالبًا المحرك الرئيسي لكل شيء بأعمله بدون ما أحس. هو اللي يخليني أقرأ كتب ما لها علاقة بتخصصي، وأسأل ChatGPT كل يوم كمية أسئلة لا منتهية، وأدخل تجارب جديدة فقط لأني أبغا “أجرب”. أحيانًا يكون مرهق، لأنه ما فيه زر "إيقاف". أتوقع هو جزء من هويتي وأني بديت أتفهم نفسي أكثر. أنه دائمًا راح يكون طبع في أني أسأل وأبحث، حتى في الأمور اللي ممكن البعض يمر عليها مرور الكرام.

ولأني متعودة على هذا كله، ما استوعب أني أعتبر أشتغل في مسارات متعددة لأني أشوفها كلها تصب في نفس الشيء من وجهة نظري. ما أشوفها تفرعات قد ما أشوفها محاولات لاكتشاف جوانب مختلفة من نفس الرحلة. كل تجربة خضتها، حتى اللي ما كملت فيها، علّمتني شيء ما كان ممكن أتعلمه لو ما جربت.

غالبًا ما نربط الفضول بالطفولة، أو بالعلماء والمبدعين، لكن نادرًا ما نربطه بالمنظمات، أو بالتغيير الاجتماعي. وهذا في رأيي جزء من المشكلة. لأن كل تغيير حقيقي، يبدأ غالبًا بسؤال بسيط: ليش نعمل كدا؟ هل في طريقة أفضل؟

الفضول المؤسسي هو لما تصير بيئة العمل تشجّع الأسئلة، مو بس الأجوبة. لما يُسمح للناس يقولوا "ما أدري، خليني أبحث"، بدل ما نسوي نفسنا فاهمين واحنا مو عارفين. يضحكني أحيانًا إني لا زلت أستقبل رسائل تستغرب لما أقول "ما أعرف" أو "اسألوا مختص"، خاصة إذا كان السؤال خارج تخصصي، أو حتى داخله لكنه في مجال ما قرأت عنه كثير. هل لهذه الدرجة نخاف من أن نظهر عدم معرفتنا؟ هل محرجين من أنه نبان بمظهر الجاهل؟ يمكن ما تعوّدنا فيها على قول "ما أعرف" وصار فيها نوع من التوقع الصامت إنك دايمًا لازم تجاوب، حتى لو المعلومة ناقصة أو غير دقيقة.

لكن لو نرجع للأساس: اش يعني احتراف مهنة ما أو تخصص؟ هل هو كثرة المعلومات؟ إذًا خسرنا خلاص، الذكاء الاصطناعي فاز علينا. ولا هو القدرة على التمييز متى تجاوب ومتى تحيل السؤال؟ الفضول لا يعني إنه كل واحد راح يصير خبير في كل شيء، لكنه يعني إننا نخلق بيئة نعتبر فيها السؤال جزء من العمل، مو تهديد له. اللحظة اللي نسمح فيها لأنفسنا نقول "ما أعرف، خليني أبحث" هي اللحظة اللي نتحرر فيها من وهم الكمال، ونبدأ نشتغل على تطوير حقيقي ومستمر.

هل تشعر أنه الفضول له دور أساسي في حياتك؟ شاركني في التعليقات.